黃飛鴻、梁贊、葉問、李小龍，都係響噹噹嘅中國近代武術家，佢哋幾位都有一個共通點，就係同廣東佛山淵源甚深。廣東省佛山市，係著名嘅武術之鄉，亦係南派武術一個重要基地。不過，不少為世人熟悉嘅南派武術，其實都唔係源於佛山。
南派武術當中，洪拳、蔡李佛、詠春等都係為後世人推崇嘅南派功夫，但據研究，呢啲武術都唔係源於佛山。例如，洪拳創始人洪熙官並非佛山人；蔡李佛拳創始人陳享為新會人；至於詠春，創始人係邊個一直眾說紛紜，但無論係五枚師太抑或嚴詠春，本身都唔係佛山人。
儘管係咁，佛山响南派武術發展仍有舉足輕重嘅地位。好多門派功夫雖然唔係源於佛山，但就响佛山得以發揚光大。咁點解佛山會成為南派武術重鎮呢？有研究指出同當時佛山經濟因素有關。佛山以盛產絲綢、陶瓷聞名，所以當地人生活較為富裕，不少名門望族子弟「二世袓」不愁三餐，所以佢哋能專心學拳。另外，佛山手工業發達，作坊僱用嘅工人人數眾多，工人階層都有响工餘習武嘅習慣，响不愁生員嘅情況下，各地武術家都願意响佛山開館授徒。